दिनेश एफएमकर्मी नवराज धानुकमाथि कुटपिट गर्ने साविकको जिल्ला खेलकुद विकास समिति कैलालीका अध्यक्ष दिपक सिह अझै पक्राउ परेका छैनन् ।
आवश्यक कारबाहीको माग गर्दै कुटपिट गर्ने सिह विरुद्ध गत शुक्रबार नै मुद्धा दर्ता गरिए पनि प्रहरीले पक्राउ गर्न नसकेको हो ।
कुटपिटमा संलग्न सिह पक्राउ नपरेपछि आइतबार धनगढीका पत्रकारहरुले जिल्ला प्रहरी कार्यालय कैलालीका प्रमुख प्रहरी उपरिक्षक बिनोद घिमिरेलाई भेट्दै घटनालाई गम्भीर रुपमा लिन आग्रह गरेका छन् ।
उनीहरुले दोषीलाई पक्राउ गरी आवश्यक कारबाहीको माग समेत गरेका छन् ।
जवाफमा प्रहरी प्रमुख घिमिरेले दोषीलाई पक्राउ गरेर कारबाहीको प्रक्रिया अगाडी बढाउने प्रतिवद्धता जनाएका छन् ।
उनले आफूले अपराधिलाई पक्राउ गरेर कारबाहीको प्रक्रिया अगाडी बढाउने बताए ।
दिनेश एफएमकर्मी धानुकमाथि गत विहीवार साँझ सवा ७ वजे धनगढीको एलएन चोक नजिकै जिल्ला पशु सेवा कार्यालय अगाडी साविकको कैलाली जिल्ला खेलकुद विकास समितीका अध्यक्ष सिंहले फिल्मी शैलीमा आक्रमण गर्दै कुटपिट गरेका थिए ।
घटना लगत्तै फरार रहेका सिंहलाई राजनितिक संरक्षणका कारण पक्राउ नगरिएको आरोप लागेको छ ।
तत्काली नेकपा एमालेको युवा संघमा आवद्ध सिंहलाई प्रदेश सरकारका मन्त्रीहरु आफन्त र मन्त्री नजिकको भएकोले पनि पक्राउ नगरिएको स्रोतले जनाएको छ ।
