डडेल्धुरा, साउन २२, २०७५ ।
डडेल्धुराको आलिताल गाँउपालिकाका सामुदायिक विद्यालयमा राखिएको बायोमेट्रिक्स डिजिटल हाजिरी प्रभावकारी बन्दै गएको छ ।
गाँउपालिकाका अध्यक्षले कार्यकक्षमै बसेर शिक्षक विद्यालय आए अनाएको निरीक्षण गर्न पाउने भएपछि सो प्रविधि प्रभावकारी भएको हो ।
सबै शिक्षक आए नआएको र अनुगमन गर्न सम्बन्धित विद्यालय पुग्नु नपरेपछि समयको बचत भएको आलिताल गाँउपालिकाका अध्यक्ष बलबहादुर गुरुङले बताए ।
अध्यक्ष गुरुङले आफ्नो कार्यकक्षबाटै कति जना शिक्षक विद्यालय हाजिर भएको, कतिजना नआएको साथै पूरा समय विद्यालय बसे नबसेको कार्यालयबाट नै जानकारी लिने गरिरहेका छन ।
“सामुदायीक विद्यालयमा राखिएको यो प्रविधि नेपालकै पहिलो हो ।”
अन्य संघ संस्थामा यो प्रविधि जडान भए पनि सामुदायिक विद्यालयमा राखिएको बायोमेष्ट्रिक हाजीरी पहिलो भएको उनको तर्क छ ।
गाँउपालिकाका रहेका १७ ओटा सामुदायीक विद्यालयमा सो प्रविधि जडान गरिएको छ ।
गाँउपालिकामा रहेका सबै माध्यामिक तहका सबै सामुदायीक विद्यालयमा पहिलो चरणमा बायोमेट्रिक हाजिरी प्रणाली सञ्चालन गरिएको हो ।
सामुदायिक विद्यालयको नतिजा राम्रो नहुने, शिक्षक, शिक्षिका नियमित विद्यालय नआउने लगायतका गुनासाको सम्बोधन हुने आशाले विद्यालयमा बायोमेट्रिक्स हाजिरी मेसिन राख्न शुरु गरिएको गाँउपालिकाले जनाएको छ ।
शिक्षक विद्यालय आए पनि पूरा समय विद्यालय नबस्ने भएपछि विद्यालय आइसकेपछि शुरुमा र विद्यालय छुट्टी भइसकेपछि दुई पटक हाजिरी गर्ने व्यवस्था मिलाइएको छ ।
पहिलो चरणमा माध्यामिक तहका सबै विद्यालयमा राखिएको हाजिरी मेसिन प्रभावकारी भएपछि दोस्रोचरणमा अन्य विद्यालयमा सो प्रविधि राख्ने तयारी भइरहेको गाँउपालिकाले जनाएको छ ।
विद्यालय र प्राथमिक स्वास्थ्य चौकीसँगै गाँउपालिकाको कार्यालय र ८ ओटै वडा कार्यालयहरुमा राखिएको डिजिटल मेसिनमा शिक्षक र स्वास्थ्यकर्मीका साथै कर्मचारीहरुले हातका औंठाले छोएर हाजिर गर्ने गरेका छन ।
हाजीर लगाउने बितिक्कै गाँउपालिकाको कार्यालयमा रेकर्ड जाने गर्दछ ।
गाँउपालिकाले त्यसका लागि छट्टै कम्प्युटरको व्यवस्था गरेको छ ।
अध्यक्ष गुरुङले यो प्रविधि प्रभावकारी भएको भएको बताउँदै अझ अन्य विद्यालय र सार्वजनिक निकायहरुमा थप गर्ने हौसला बढेको बताए ।
रु २० देखि ३० हजारमा यो प्रविधि एउटा विद्यालयमा जडान गर्न सकिने आलिताल गाँउपालिका–४ का वडाध्यक्ष चन्द्रदेव बोहराले बताए ।
यो प्रविधि खासै खर्चिलोसमेत नभएकाले सबै विद्यालय र कार्यालयमा थप्न सकिने उनले जानकारी दिए ।
आलिताल गाँउपालिकाले सबै घरको लगत सर्वेक्षणसमेत डिजिटल प्रविधिबाट गरिरहेको छ ।
गाँउपालिकावासीले गाँउपालिकाले राखेको आफ्नो रेकर्ड घरमै बसीबसी हेर्न मिल्ने व्यवस्था समेत मिलाइएको गाँउपालिकाको कार्यालयले जनाएको छ ।
गाँउपालिकाभित्रका बासिन्दाको व्यक्तिगत विवरण, एकीकृत सम्पत्ति करको रेकर्डलगायतको विवरण डिजिटल प्रणलीमार्फत नै गर्न शुरु गरिएको हो ।
