बुटवल,साउन २२, २०७५ ।
रुपन्देहीको कञ्चन गाउँपालिका–५ की १६ वर्षीया किशोरी समीक्षा ठकुरीको हत्याको अभियोगमा आफनै बुवा सहित तीन जना पुर्पक्षको लागि थुनामा चलान भएका छन् ।
रुपन्देही जिल्ला अदालतका न्यायाधीश शारदाप्रसाद कोइरालाको एकल इजलासले समीक्षाका बाबु तेजबहादुर ठकुरी, हजुरआमा हरिकला माया ठकुरी, समीक्षाका फुपू अमृता भनिने शोभा राना ठकुरीलाई पुर्पक्षको लागि थुनामा पठाउने आदेश दिएको हो ।
घटना विवरणअनुसार गत असार ९ गते आफ्नै घरमा सुतिरहेको अवस्थामा शरीरमा आगलागी भएर गम्भीर घाइते भएकी समीक्षाको असार २० गते उपचारका क्रममा काठमाडौंमा मृत्यु भएको थियो ।
समीक्षाको मृत्युपछि इराकमा रहेकी आमा माया ठकुरी नेपाल फर्कि मार्ने उद्देश्यले मट्टितेल छर्केर आगो लगाइदिएको र सोही कारण जलेर मृत्यु भएको दावी सहित आफनै श्रीमान विरुद्ध किटानी जाहेरी दिएकी थिइन् ।
किटानी जाहेरीका आधारमा प्रहरीले तीनजनालाई पक्राउ गरी २५ दिनसम्म म्याद थप गर्दै अनुसन्धान गरिरहेको थियो ।
अर्की अभियुक्त समीक्षाकै फुपु मधु ठकुरी थापा फरार रहेकी छिन् ।
